Western Zone South Ampati ni GSU dolrang August 10 tariko South West Garo Hills a∙jani Deputy Commissioner aro District Selection Committee-ni Chairman RP Marak-na lekka sedoate mol∙molaniko dakangaha. Uamangni DC na janapatanio District Selection Committee (DSC) ni kamrangna seokaniko dakengon a∙jatangni chadamberangko skanggipao done seokaniko dakna nanga ine mol∙molataha. GSU rangni chittio janapatanigitade DSC ni kamna a∙jatango skia man∙gipa aro kragipa manderang dongjaosa, man∙a kratelgipa manderangko kamo ra∙napna nanga ine didiangaha.
Iako ja∙rikanichi dingtang dingtang department rango sorkarini kamrangna nakatanio SWGH o songdongenggiparangna apsan tikatna man∙gen ine uamang parakangaha. Unbaksana a∙jatangni tang∙doanina aro manderangna nambata gadango janggi tangna cholko on∙an baksa dakchakaniba ong∙anggen. SWGH a∙jao skia man∙gipa chadamberang gnang aro uandake DSC ni kamrangna seokanio uamangna cholko on∙a nanga ine nambata ja∙kuko de∙china GSU dolrang DC o mol∙mole lekkako on∙angaha.
