Soil & Water Conservation Department-ni kamrangko nipilna Tura o tom∙a

August jani 10 tariko Tura Circuit House o Soil and Water Conservation Department adita kamrangni bidingo nipiltaina tomꞏaniko ongꞏate chanchirimangaha. Ia tomꞏanio Soil & Water Conservation Department ni Minister Marcuise N. Marak, WGH a∙jani DC Jagdish Chelani, department ni officer-rang aro kam ka∙gipa manderang bakko ra∙angaha.

Ia tom∙anio department-ni jako ra∙e kam ka∙enggiparangni bidingo ningꞏtue uꞏie ra∙angaha aro chu∙sokgimin kamrangkoba nipilange chanchirimangaha. Unbaksana a∙jani dingtang dingtang biaprango namroro silroroaniko bariatna nangenggiparangko ma∙sie ra∙e mikkangchi kamko ka∙na tom∙anio golporimangaha. Department ni adita officer rangni agantalate on∙anirangko, kamrangko baditana a∙bachengataha aro ka∙na nangenggiparangkoba parake on∙angaha.