Da∙al salni bako Ampati Urban Health & Wellness Centre ko Mahendraganj-ni MLA Sanjay A. Sangma oprake on∙angaha. Ia program-o Ampati ni MDC Stevie Marak, Mahendraganj ni MDC Akter Ali, SWGH a∙jani Deputy Commissioner RP Marak, SWGH ni Superintendent of Police V Kumar, Betasing Block-ni BDO CRN Sangma, Ampati giljani Pamong WG Sangma, SWGH ni DMHO H Barman aro dingtang dingtang line department ni official-rang bakko ra∙angaha.
Ia gitalgipa Centre ko ra∙baanichi biapo songdongenggipa sak 8,000 manderangna aro ge 19 songrangna nambata sanna bannanirangko on∙agita dakchakanggen. Ia centre o mongsongbate an∙o donggiparangna aro bi∙sa rangko biji su∙anio sanna bannanirangko daknagita re∙chakatna miksongenga ine u∙iataha. Unbaksana wilwilao dongenggipa manderangna mikkangchi nambata sanna bannanirangko on∙e namdapatani kamrangkoba ka∙anggen ine koborna parakataha.
