North Eastern Electric Power Corporation (NEEPCO) a∙dok baksa 500 MW thermal power project ko a∙bachengna soi ka∙e songgigrikaniko ra∙galaha ine Power Minister AT Mondal u∙iataha. Iako ra∙galani a∙selara, Meghalaya a∙dokna bijoliko suale on∙enggipa public sector unit sal aro balwao pangchake bijoli bikotna miksongani dongani gimin ong∙a ine Mondal aganangaha.
A∙doko iako ra∙galani bidingo janapengon ge∙gipin company jean DS Group minggipa baksaba thermal power project na MoU ko soi ka∙grikaniko dakgenchimoba ua company oni maming kobor dongkujaenga ineba Mondal aganaha. Hydel project ko dakanio bang∙ata namgnirang man∙ani gimin a∙dok sorkari thermal project ko ra∙galskae uko dakna miksongenga ineba ua agandapangaha.
Hydel power project ko dakgenchimode adokna 12 percent ni gita dam gri bijoliko mana∙ni gnang aro 1 percent ni gita wilwilao donggipa biaprangko tang∙doatnagita man∙skaa. Thermal power ko dakanio uandakgipa namgnirangko man∙ani dongja aro thermal power ko chalaie bijoliko bikotna koelarangko jakkalna nanga jeon koelarangko man∙a neng∙nikgenchimode indin ong∙gramaigen ine Power Minister aganangaha.
