Meghalaya a∙dokni skanggipa University chongmotan Captain Williamson Sangma State University jean Balalgre SWGH a∙jao skie poraie ra∙aniko 2024 bilsioni a∙bachengatgen ine Education Minister Rakkam Sangma aganangaha. University ni damgipin campus-ko Shillong songjinmaoba songna sorkari tik ka∙aha ine Sangma Mongolbar salo parakangaha. University na Vice Chancellor, Pro Vice Chancellor aro gipin kamrangna rakkina am∙sandianikoba dakengaha ine Sangma agandapangaha.
University ni ning∙ao Higher & Technical ni a∙bao skie ra∙anirangko pakwate on∙anggen. Dingtang dingtang a∙bani subject rang jekai general science, engineering, physical science, life science, commerce, performing arts, professional courses, humanities, technology aro gipin subject rangko ia University-o mikkangchi poraiangna man∙gen.
