A∙doko BJP-ni dilgipa Himalaya Muktan Shangpliang National People’s Party (NPP) party baksa bakrimna miksonganirangko BJP-ni dilgiparang maming kobor dongja ine Robibar salo parakataha.
A∙dok BJP party-ni President, Ernest Mawrie-ni aganani gitade Shangpliang ni NPP party baksa bakrimna chanchiani bidingo uamangni party-ni gisepo maming janaparang dongkuja aro iako kobor ra∙timgiparangonikosa knana gita man∙kuenga ine aganangaha.
Shangpliang BJP party office-ona re∙baama re∙bajaenga ine singanirangko dakon, party-ni changgni tom∙anirangona ua an∙tangni re∙bana choljokgijanirangko u∙iataha. Shangpliang Education Department ni saksa Adviser ong∙ani gimin departmentni gita dingtang dingtang tom∙anirango bakko ra∙na gita nange choljokgijanichisa tom∙anirango bakko rana man∙jaenga ine Mawrie taldapataha.
