Meghalaya a∙dokan Mahatma Gandhi National Rural Employment Guarantee Scheme (MGNREGS) ni ning∙o kam ka∙giparangna hajirako on∙ani bidingo aadhaar baksa link ka∙anio a∙song gimiko gipin a∙dokrangna bate komibatsranggiparangoni damsa a∙dok ong∙enga ine parakataha. A∙doko MGNREGS ni ning∙o kam ka∙enggipa sak 9.05 lakh mangni gita dongaoni sak 28,000 mangni gitasan aadhaar baksa nangrimataniko dakaha ine u∙iataniko on∙aha.
National Rural Employment Guarantee Act (NREGA) ni ning∙o kam ka∙enggipa sakantian August 31 tarikonide Aadhaar baksa nangrimatani ja∙manosa hajirako man∙a gita amgen ine u∙iatanikoba dakangaha. Dongimin tarik sokkujana kingking minggni kamchi chong∙motan uamangni bank account aro aadhaaro pangchake hajira on∙anirangko dakanggen. February 1, tarikoni NREGA ni ning∙o kam ka∙enggiparangna hajira on∙anio aadhaar based systemko jakkalna nangtelani gimin ma∙mong sorkari a∙dok sorkarina u∙iataniko on∙ahachim. March 31 tarikona aadhaar ko bank account baksa nagrimatna bon∙kamgipa salko donatani ja∙mano June 30 tarikona ra∙doattaiaha. Ia on∙gimin tarikoni sorkarini u∙iatgimin niamko ja∙rike NREGA ni ning∙o kam ka∙giparangna hajira on∙aniko dakna nanggen ine u∙iataniko dakaha.
Kam ka∙giparangko biming serikaniko dakna gitaba dingtangmancha National Mobile Monitoring System (NMMS) App koba January 1, tarikoni jakkalna ma∙mong sorkarini gita u∙iataniko dakaha. NREGA ni hajirako man∙a minggni dakna nanggnirang jean, bank account-o aadhaar number ko nangrimatani ba bank account ko National Payment Corporation of India Mapper baksa nangrimatna nanganian ong∙a ine u∙iataniko dakangaha. Ministry of Rural Development ni batanggimin salo u∙iataniko on∙ani gitade aadhaar based payment systemko jakkalanichi NREGA-o kam ka∙gipa sakantian hajirako man∙anio neng∙nikani gri man∙a gita amaha aro ian chu∙sokgipa kam mingsa ong∙a ineba u∙iataha.
MGNREGS ni namgniko man∙enggipa sakantinan somoi gita hajirako man∙ani, dingtang bank account number rangko on∙taianirang aro program officer rangni update ka∙ninggija dongani a∙sel neng∙nikanirangko man∙enga. Ia neng∙nikanirangko nengraatna Aadhaar-Based Payment System-ko ra∙gatna gita tik ka∙aha, jedakode man∙a kragipa manderangsan scheme ni namgniko man∙a gita amgen. Aadhaar-Based Payment System-ko jakkalanichi nambate kam ka∙na gita man∙enga ine Ministry-oni u∙iatanikoba on∙angaha.
