Meghalaya a∙dokni damsa kam∙kam donggipa Mendipathar relgari station ko taridape on∙a Northeast Frontier Railways (NFR) Amrit Bharat Station Scheme nigita jako ra∙e kam ka∙angna miksongenga. A∙song gimiko chu∙gimik dam 91 relgari station rangko namdapataniko dakanggen.
NFR official-ni parakatanigitade dam 56 station-rangna namdapatani kamko ka∙na a∙bachengatnagita Prime Minister Narendra Modi pangchakani ro∙ongko August 6 tariko songe on∙anggen. Dam 56 station rangoni Assam a∙doko dam 32, West Bengal o dam 16, Bihar o dam 3 unbaksana Nagaland o dam 1 aro Meghalaya o dam 1 ko tarie on∙anggen. A∙song gimikni chu∙gimik dam 91 station-rangko taridapna gong 5100 crore ko chamataha jekon dam 56 na gong 1960 crore ko jakkalanggen.
Ia scheme-ni ning∙o adita kamrangko ka∙anggen jekai rel station-ona re∙a doaniko namdapatani, sengchakram kutturirangko tariani, Elevator aro escalator rangko ra∙baani, paikana rikani, Wi-Fi rangko indin on∙a, chonchona dokanrangko tarina, koborrangko songregiparangna nambate sokatna aro gipin kamrangkoba ka∙angjolgen. Meghalaya a∙dokba ia scheme ni namgniko damsa relgari station dongpae namdapata gadangona sokangna cholko man∙angenga.
