East Jaintia Hills a∙jao matchu manggniko badingsruke alto gario gate Bangladesh a∙songchina palatna ra∙angenggipako BSF sipai dolrang naljokataha. Uamangni salenggipa gariko sipairangni neng∙takchina aganon uamang katna jotton ka∙aha ine BSF dolrang parakataha. Badingsrukgiparangko Sonapur dollongo garirangko donpengesa dondikatna man∙aha jeon uamang an∙tangni gariko gale katangaha ine BSF dolrang u∙iataha.
Rim∙a man∙gipa matchu aro garirangko Umkiang pulisrangna dosi dakgiparangni kosako raka ja∙kuko de∙nagita BSF dolrang pakwatangaha. Apsan dakgipa obosta EJH a∙jao India aro Bangladesh ni sima ari jolo mijal salni bako ong∙angaha jeon gong lakh 22 ni ganding chinding bosturangko badingsrukanggipako BSF dolrang rim∙na man∙rikaha.
