Inland Waterways Authority of India (IWAI) skanggipa changna Shillong songjinmao tom·aniko dake mining sector o bak donggipa manderang baksa bosturang aro koelarangko chibimaranggita salrurana chanchirimaniko dakangaha. Ia tom·anio Salgro Salaramni Indo-Bangladesh Protocol (IBP) ramarangko nangatgija chibimagita maikai komia damo a∙dokni bosturangko salrurana man∙gen ine mikgsonge chanchiangaha.
Meghalaya ona bosturangko salbana aro salangnagita Assam-ni Pandu aro Dhubri o terminal operator rang jako ra∙e kamko ka∙angna man∙skagen. Ia terminalrangan IBP rama aro India a∙songni mongsonggipa biaprangona bosturangko ra∙ruraani cholguga ong∙a ine IWAI Traffic and Logistics ni member Vinayak Azaad aganangaha.
A∙dok sorkariko je chibimarangan Bangladesh ona jokanga uarangko see on∙chinagita u∙iataha. Iano pangchake chanchirimani ja∙mano badia chibimarangni rama meligrikaniko nigrike bosturangko salnagita tik ka∙aniko dakanggen ine Azaad aganangaha. Bosturangko chibimaranggita salruraani koros ramagita salana bate changgittam mang komibata aro buring bolgrim, matburingrang, manderang ba uandakgiparangna maming gimaaniko ra∙baani dongja ineba ua agandapangaha.
