GHADC ni saksku gitcham Executive Committeeni member-rang, sakgni contractor aro saksa GHADC ni gitcham Principal Secretary ko Meghalaya Lokayukta-ni ning∙o mokordoma ka∙angaha. Lokayukta ni Investigating officer Anil Sangma ni dile am∙sandie man∙gimin sakkirango pangchake uamangni kosako badi ka∙doangskaaha.
Da∙o ong∙enggipa Mahendraganj ni MLA Sanjay A Sangma, gitcham CEM Denang T. Sangma, gitcham MDC Augustine R. Marak, Brilliant R. Sangma, Dipul R. Marak, Kurosh M. Marak, Winninson Ch. Marak, Dolly K. Sangma, Bhupen Hajong, Sukaram K. Sangma, gitcham GHADC Secretary Hewingson A Sangma aro contractor Dolrich D. Sangma ni kosako Human Rights and Anti Corruption Activists Youth Power of India-ni Working President Kingstone B Marak badi ka∙angaha. Uni aganigitade uamang Tura Member Hostel-ko rikna chamatgimin tangka gong 6,01,31,100 crore-ko tikatgenchimoba matchote kam ka∙jaha ine parakataha. Ia tangkarangko Special Assistance of Central Plan Scheme ni ning∙o 2015 aro 2016 bilsini gisepo Ministry of Finance nigita gong 100.71 crore ko GHADC na Schedule Tribe biaprangko tang∙doatna chamatgipa tangkarang ong∙a.
Lokayukta ni skanggipa changna am∙sandie nianio project-rangko kam ka∙ani tik ong∙ja ine nike che∙eme am∙sandianiko dakna ge∙etatskaaha. Inquiry wing ni member Anil Sangma ni dil∙anichi tale roke am∙sandiani sakkirango pangchake report ko parakatani ja∙mano dosi donga ine u∙iatskaaha. Lokayukta ni am∙sandie man∙gimin report rangko Turani Special Court na pakwatataha. Uamangni kosako Turani Special Court mokordoma ka∙e August jani 29 tariko Court ona uamangko re∙bachina okamataniko dakenga ine parakataha.
