August jani 1 tariko Meghalaya Handloom & Handicrafts Development Corporation Limited ba MHHDC, Meghalaya a∙doko ma∙manti bosturangko tarigiparangna MHHDC ni Chairperson Santa Mary Shylla ni jakchi e-catalogue ko oprake on∙angaha. Iako ra∙baanichi songadam nokadamo ba∙ra doke cha∙gipa, ma∙manti bosturangko tarigipa aro janggitangna dake cha∙gipa manderangni changa sapaniko tang∙doatna miksongani ong∙a. E-catalogue-chi uamang an∙tangtangni changa sapaniko jakkale manderangni nangnikagita bosturangko tarina a∙doko aro a∙palrangona pale sime cha∙na dakchakaniko ra∙bagen.
Songadamrango dake cha∙enggiparang uamangni bosturangko online gita mesokate bosturangko bregiparangna altubee ninagitaba dakchakbeani ong∙gen ine Shylla parakangaha. Re, wa∙a, bol, jakchi sikgimin ba∙ra kancharang aro tarigimin bosturangko bregiparang meghhdc.co.in o napange ba QR code o scan ka∙e ninagita man∙gen. MHHDC ia bosturangko da∙o dipet a∙dokni dingtang dingtang biap ba dokanrango, Kolkata aro West Bengal-ni adita biaprango palaniko dakenga ine u∙ina man∙angaha.
