Adita jarangna skang Meghalaya Public Service Commission (MPSC) ni kamrangna Garo rangko ra∙napna nakatatgipani bidingo Rongrong-ni MDC Rinaldo Sangma, Meghalaya High Court-ni reservation roster system o pangchake kamrango ra∙napna ge∙etgimingita ong∙ja ine Chief Minister na chitti see mol∙molataha. Meghalaya Secretariat-o L.D. Assistant kamna 2022 bilsini September 14 tariko Garo rangna tikatgiminara ge 43 kamrang ong∙achim jekon 2023 bilsini July 28 tariko gital nakatatanio kamrangko ge 39 ona tang∙onatskaaha. Iani bidingo ua Chief Minister-ko ong∙gija kamrangko nigrike tik ka∙e on∙pachina mol∙mole uni seanio parakataha.
Garo rangna kamrangko tikatna nakatatgiminko High Court-ni ge∙etagita ong∙gija dingtangataha aro Garo jatna kamrangko komiataha ine ua parakangaha. Iani bidingo Sangma kamrangko tikataniko maio pangchake dingtangataha ine sing∙doaniko dakangaha. Gitalgipa roster reservation-ni Office Memorandum-o pangchake dingtangataniko u∙iata dongahama ineba ua sing∙aniko dakangaha. Ian jatni man∙a nanggniko on∙gijani ong∙a aro High Court-ni ge∙etaniko mande ra∙gijani ong∙a ine MDC chittio janape aganataha.
