West Garo Hills a∙jani Phulbari-Rajabala a∙kawe jolni bilsi 16 ong∙gipa me∙chik bi∙sa Sonibar wal oni gimaenga ine koborko u∙iataha. Me∙chik bi∙sani pagipa Md. Joinal Hoque-ni aganani gitade, uni demechik July 29 walni 9 bajioni uamang nokoni gimaaha ine pulisrangna u∙iataha.
Adita somoirangna demechikgipako jotton ka∙e am∙sandianiko dakgenchimoba uko nikna man∙jaha. Uni demechikgipa an∙tangni jakkalgipa bosturangoni mamingkoba nokoniko rabitanga donggija gimaenga ine kobor ra∙timgiparangna parakataha.
Ia duk mikchini somoio gimaenggipa me∙chik bi∙sako pulis dolrang am∙sandianiko dakna a∙bachengataha. Uni gimaaniara saoba rim∙draani ba rim∙srukaniko dakangahakon inesa pulis dolrang rim∙chipe aganangskaaha.
