Garo hills ni bang∙bata biaprango konta 8-10 mangna salanti bijoli man∙jagenchim ong∙oba da∙o gamna nanganirang bang∙dugae sokenga ine koborna parakataha. Komibea bijolirangko man∙genchimoba gamna nangani gong 3,600 mangona sokenga aro ia nokdangrang BPL o segatgiminrang ong∙a. Smart meter rangko tekani ja∙mano gamna nanganirang bataha ineba u∙iataha. Uasan ong∙aigija bang∙a neng∙nikanirang jekai me∙chik saksani jao gamna nangani uni ja∙rikit man∙gipa betonna batpile sokaha aro uko gamna da∙onaba ua neng∙nikuenga ine koborna parakataha.
Bijoli bikotgipa chibimarango chu∙ongagita chi dongenchimoba maini gimin bijoli den∙aniko dakuenga aro baditana MeECL ni kam namgijani a∙selo manderang neng∙nikaniko man∙enga ine manderang sing∙doaniko dakatenga. Ian uamangni bijoli bikotenggipako gipinchina palna miksonganiko u∙ina man∙a ine matnanga gnang aganatskaaha.
Garo hills ni a∙kawe jolrango donggipa bijoli bilakgijani ba low voltage ong∙anirangko da∙onaba chagrongkuenga. Jakkalgipa bijolirangnikosan manderang gamna nanga aro bijoli den∙anina maming saloba gamna kraja ine saksa mande bijolini a∙selo neng∙nikani bidingo aganangaha. Ia mamlako saoba court-china ra∙doangna nanga ine ua agandapangaha. Ian songdongenggipa manderangni bijoliko watani bidingo MeECL-ni kosako sing∙doanirangko niknagita man∙enga.
