National Education Policy (NEP) 2020 ko ia bilsioni undergraduate course-rangna ra∙gatna miksonganiko Meghalaya Tribal Teachers’ Association (MeTTA) jegalataha. Je college rangan universityni bak ong∙paa NEP 2020 ko ia bilsioni ra∙gatna nanggen ine Officer on Special Duty (OSD), College Development Council (CDC), North-Eastern Hill University (NEHU) July 12 tariko u∙iataniko dakangaha. Chang 110 gipa Academic Council NEP 2020 ko ra∙gataniko ra∙chakaniko a∙kangna nangja ine OSD, CDC office-rangko aro NEHU ni Vice-Chancellor-ko MeTTA didiangaha ine uamangni President DRL Nonglait aganaha.
Rika cho∙anirango ba skigipa chu∙ongkugijagipa college rang NEHU ni dilgiparangna u∙iatna nanga ine aganggimin katta gnang ine Nonglait janape aganangaha. NEP 2020 ko ia bilsioni ra∙gatna ge∙etani gimin jera ra∙aniko dakanio NEHU chu∙ongnikgenchimode, ua collegerang bilsi gipinoni ra∙gatskana man∙gen ine MeTTA ni President aganaha. NEP 2020 ko ra∙gatna ge∙etaniara niamo pangchake kam ka∙ani ong∙a ine ua aganaha.
NEP 2020-ko ra∙gataniko NEHU Academic Council o chanchirime tik ka∙kugijaniko ra∙chakna man∙jawa ine Nonglait jegala gnang aganangaha. NEHU-ni a∙doko gital NEP ko ra∙gatani gimin namnikgijaniko aro jegalaniko mesoknagita skanggipa semester ni class rangko napgija dongna Meghalaya College Teachers Association (MCTA) tik ka∙angaha. Re∙anggipa Sonibar salo association ni tom∙anio nadoate uamangni namnikgijanko mesokna chanchirime tik ka∙angaha.
