North Eastern Handicrafts aro Handloom Development Corporation (NEHHDC) ni re∙anggimin bilsi gittamo skie ra∙ani programme, tarigimin bosturangko mesokani, changa sapaniko skie ra∙ani workshop rangko ong∙atangaha. Iano bak ra∙anichi Meghalaya a∙dokni sak 636 ba∙ra dokgiparang aro jaktangchi bosturangko tarigipa manderang namgniko man∙angaha. NEHHDC-ni iako ong∙ataniara Northeast a∙jani manderangni daka rika ba sol∙a repa niko nambata gadangona ra∙doe bosturangko palanirango dakchake janggitangani cholrangko on∙a gita miksongani ong∙a.
Minggipin uamangni kamara India aro gipin a∙songrangona online gita bading chiwalna dakchakaniko on∙enga. Iako nambata gadangona ra∙dona gita NEHHDC ge 30 dolrang baksa Memorandum of Understanding (MoU) ba soi ka∙anirangko dakangaha. Indian Institute of Management (IIM) Shillong, National Institute of Fashion Technology (NIFT) Shillong, National Institute of Design Jorhat aro uandake bang∙a dolrang baksa soi kagrikangaha.
Scheme of Fund for Regeneration of Traditional Industries (SFURTI) ni ning∙o kamrangko nirokchina gita Micro, Small & Medium Enterprises (MSME) Ministry aro ma∙mong sorkari NEHHDC ko mongsonggipa ong∙e seokaha. NEHHDC bang∙a training rangko National Skill Development Council (NSDC) baksa bakrime kam ka∙na gita Skill India of the Ministry of Skill Development and Entrepreneurship ni ning∙o an∙tangtangko biming segataha.
Ba∙ra dokna aro jaktangchi ma∙manti bosturangko tarianiko daknagita NEHHDC ’Nature Weave’ ine bimingko done a∙bachengataha. Matchotgimin bosturangko porikka ra∙na gita Garchuk, Guwahati o Textile testing laboratory koba kuliangaha. NEHHDC ni re∙anggimin bilsi gittamo man∙anirangara 2020-2021 o gong 105.87 lakh, 2021-2022 o gong 369.22 lakh aro 2022-2023 o gong 565.22 mangni gita ong∙a.
