Dontonggija mongmarangko ripinganio, Assam-Meghalaya sima ari jolo donggipa songrango, mande aro mongma baksa nanggrikanirangko chel∙chakna ba nirokna, Assam a·dokni Goalpara aro Meghalaya ni East aro West Garo Hills a·jani Wildlife Division official-rang baksa Tura-o meeting-ko ong·atangaha ine parakataha.
Ia tom·anio Goalpara oni IFS, DFO Tejas Mariswamy, Garo Hills a·jaoni IFS, Conservator Forest S. N. Sangma; Rupanker K. Marak MFS, DFO, Tura; Bibhuti, Aaranyak aro gipin Garo Hills Wildlife Division-ni Range Officer-rangba dongpae bakko ra·angaha.
Ia chanchirimanio officer-rang mande aro mongmarangni nanggrikaniko champengna, mongmarangni dongramna aro mongmarangna a∙dok damsaoni damgipinona nengrae re∙rurana man·a gita bakrime bilake kamrangko ka∙na chanchianirangko ra·chakangaha.
Unbaksana mongmarangni re∙ruraaniko altuae nirokna man∙a aro kobor ra∙grikna gita nangrime WhatsApp group-ko kulinaba tik ka·angaha. Damgni Division-ni Assam-Meghalaya sima arini gisepo skanggipa changna World Elephant Day-ko August 12 tariko ong·atrongna manchiangaha. Goalpara aro Tura-ni Wildlife official-rang dolgnini gisepo robol kal∙susagrikna August-ni bon∙kamgipa antio Tura-o ong·atnaba tik ka∙e donangaha.
