Garo Hills ni wilwilao donggipa Gram Sevak aro Sevika dolrangna dingtangatani cholrangko on∙a, salsana skie ra∙ani ba workshop ko Rongram C&RD Block WGH, a∙jani ning∙o donggipa Asanango ong∙atangaha. Ia workshop-ko C&RD department, Meghalaya sorkari, State Institute of Rural Development (SIRD) aro All Garo Hills Gram Sevak and Sevikas Association (AGHGSA) nangrime ong∙atangaha. C&RD ni Principal Secretary Sampath Kumar, pilak AGHGSA tom∙anio donggipa dolrangko uamangni kamrangko dingtangatna aro manderangna nambate dangdike on∙a ku∙pattianirangko on∙anina mittelpilanikoba dakangaha.
Gram Sevak aro Sevikarangni kam ka∙anio songadam aro a∙dokni kamrangko block-ni gita ma∙sianiko ra∙baanina uamangni kamna mande ra∙a gnang ua aganangaha. Ian uamangni bimchipe songadam nokadamrangna dangdike on∙aniko mesoka aro uamangko bilakbatatna nambata ja∙kurangko de∙na nanga ine ua agandapangaha. Songsalni dingtanganiko nike uamangni kamko u∙ina man∙a aro sorkarini scheme-rangko manderangni namgnina jakkalanikoba nikenga ine Kumar uni agananio parakangaha.
SIRD ni Director Sanme R Marak-ba uni agnananio Gram Sevak aro Sevika rangko songsalni ka∙dongani aro songadam-nokadamrangni namgnina kam ka∙giparang ong∙a ine parakangaha. Uamangni ka∙kimchae kam ka∙aniara songsalni janggi tanganiko tang∙doatna aro kangal cha∙asianiko gimaatna namen dakchakbeani ong∙a ineba aganangaha.
