Education Minister Rakkam A. Sangma Tura-o ong∙ronggijagipa kajia golmalko ong∙ataniara a∙dokni Chief Minister Conrad Sangma ko chadrapanisa ong∙a ua agananga. Iani bidingo Sangma name dake am∙sandianiko dakchina gita didianga. Ia so∙sojengjeng ong∙anio mittam dilgiparangni Trinamool Congress-sa Garo party ong∙a ine agananirangko knaaha. NPP party-ko uamang Garo aro Khasi party ong∙na kraja jekon Nepali People’s party-sa ong∙na kraa ine chrike a∙boke agananikoba nikna gita man∙aha. Indakgipa kattarangko jakkale chrik a∙bokaniara politics-ni gita jak donganiko name dake niknagita man∙a ine Sangma aganangaha. Rim∙a man∙giparangoni mittam-de party-ni dilgiparang ong∙a aro ua so∙sojengjeng ong∙gipa walni somoi-o CM a∙palona ong∙katgenchimode mai dakgipa a∙selona sokanggenchim ine ua singdoaniko dakangaha.
Chief Minister Conrad Sangma aro NGO-ni dilgiparang baksa Tura-ko a∙dokni Winter Capital dakna chanchirimaniko dakmiting somoi-o chadrapaniko Garo National Council (GNC) ba jegale aganataha. Ia a∙sel ong∙anio manderangko ong∙gija kattarangko agane dakdilaniko jawilwatrango niksona man∙e ian a∙dok gimikna kratchaaniko ra∙baani ong∙a aro niamni gita dosi dakgipa manderangko rim∙na nanga ine GNC ni General Secretary Augustine R. Marak aganangaha. Chief Minister-ni gadangna aro okgimu chakgipa dolrangko mande ra∙aniko mesokna nanga ine ua agandapangaha.
