Mijal salni bako bilsi 41 ong·gipa Neverson Nongkseh Umden songoni an∙tangni song Umshaken-ona bike sale re·angmitting somoio ramao bijolini siliting nange siaha ine koboro parakataha.
Mikrontangchi nikgiparangni aganani gitade Meghalaya Energy Corporation Limited (MeECL) ni simsakgija rika cho∙ani kamrangni a·sel ong·aha. Bijolini wire-rangko wa·achi aro bolrangchi pingripilaha aro salanti nirokani kamrangko dakjani a∙selsa ong∙aha ine u·iataha. Ia obosta mikka jimbee kimprete waani somoio ong·aha ine nikgiparangoni saksa aganangaha.
Sianggipani mahari Toris Nongkseh, mikkangchi apsan obosta ong·jachina gita bijolini wirerangko sringbaengon rika cho∙ani kamrangko name nirokchina gita aganangaha. Sianggipani nokdangna MeECL department-ko ex-gratia payment-o pangchake gamchina gitaba dabiangaha.
Ia ong·a obostako Nongpoh Pulis Station-o koborko on·eaha aro sianggipani manggisiko post-mortem-na ra·angaha. Iani bidingo am∙sandianiko dakanio da∙ona dipetde mamingkon agana man·kujaenga ine pulis dolrang parakataha.
