Congress Working President aro gitcham Minister Deborah C. Marak Turao kajia golmal ong·anina aiao inmane ia ong·gimin obostani bidingo dilgiparangko daito ra∙na nanggen ine parakataha. Chief Minister aro ACHIK dolni gisepo golpogrikaniko dakmiting somoio kajia golmal ong·anina aro golpogrikani matchotkujaon maikai jingjengaona sokaha ine Marak sing·doaniko dakangaha. Ua biapo songdonggipa manderangna neng∙nikaniko man·an baksa uamangni gam-jinko nosto ka·anina dabianiko dakdilgipa dolni dilgiparangko daito ra∙na nanga ine Marak aganangaha.
Winter Capital-ko Garo Hills a·jao songna man·genchimode ian dal∙gipa chu∙sokani ong·gen aro Garo Hills-ni tang∙doaniko ta∙raken niknagitaba man∙gen ine ua aganangaha. Winter capitalko ra∙bana gita sorkari name chanchiesa kamko ka∙na gita nanga ong·jaode ia apsan obostako chagrongna nangtainaba donga ineba Marak agandapangaha.
Golmal ong∙gipa biapo manderangni ka∙o nange jingjengatna a∙bachengani somoio ta∙rake nirokatgijanian administration ni dakgualani ong∙aha ineba Chief Minister ko dosi gala gnang aganangaha.
