Tura-ko Winter Capital songna aro Backlog policy na dabianio wilwilao dongenggipa dilgiparang, toromni dilgiparang aro senior citizen rangni jak on∙anichi bakrimgiparang batrikrikenga. Iako ja∙ku de∙anichi Tura-o songdonggengipa manderangna aro adita somoina nangnikgipa rika cho∙ani rangkoba chu∙sokatna man∙gen ine ACHIK dol janapangaha.
Tura-ni bang∙a dilgiparang aro Sordar rangni bakrimaniko mesokaniara aiao inmanpilgipa ong∙a. Tura songjinma dingtangmancha jatni daka rika, ong∙telaigipa nitoani aro dongtobegipa biap ong∙e sin∙karini somoio a∙songni ge∙sa niksenggipa a∙dam ong∙na amgen. Apsan daken an∙chingni manderangni bading chiwalaniko tang∙doatnaba dakchakanggen ine saksa niksenggipa Sordar janapangaha.
Winter Capital ko ra∙baanichi kajina man∙aniko mangmang bariatasan ong∙jawa indiba dingtang dingtang toromni gisepo ma∙sichakrikaniko aro apsan bakrimanioba namdapatna dakchakanggen ine Tura-ni saksa niksenggipa Pamong aganangaha. Re∙anggipa bilsirango Tura-ni tang∙doaniko aditan nikna man∙ahaoba bang∙a dingtanganirangko nangengkua. Ia Backlog policy an∙ching songjinmani nangchongmotgipa man∙gnirangko nirokatani mingsa chol ong∙a ineba saksa senior citizen agandapangaha. Ia dabianio pilak manderangni bakrimpaaniko man∙e Tura-o songdongenggiparangna ka∙donganiko on∙enga. Ia somoian Tura ko niksengatani somoi ong∙a aro iako ra∙gatna man∙genchimode a∙dokni itihaso pangna dongkamgipa bak ong∙gen aro Tura songjinma mikkangchi niksenggipa biap ba ong∙anggen.
ACHIK dol aro songjinmani dingtang dingtang dilgiparang apsan tom∙e chanchirimanirangko dake Chief Minister Conrad Sangma na uamangni nangnikaniko parakatgen ine aganangaha. A∙dokni saliram aro salaram jolrango apsan dake nirok simsakaniko dakna CM ja∙ku de∙angna nanga. Unbaksana A∙chik jatrangna Tura damsa mongsongbatgipa songjinma ong∙ani gimin name mancha nipiltaianikoba dakna nanga ineba ACHIK-ni ku∙wattimgipa Laben Marak agandapangaha.
Winter Capital ni miksonganiara sin∙kari somoirango sin∙a chakna amgijagipa biaponi jite damgipin skotongoni, sorkarini nangchongmotgipa kamrangko ka∙nagita cholko on∙a jean Shillong ni bodol Tura songjinmaoni kamko ka∙na man∙angskagen. Ian gipin a∙jarangonaba chu∙onga gita rika cho∙ani kamrangko sokatna dakchakanggen aro biap damsa mangmangoni pangchake nirokaniko chel∙atna amgen. Shillong aro Tura, 323 km mangni gita chel∙grikani gimin saliram jolni manderang office kam rangni bidingo neng∙nikaniko man∙enga ine ACHIK dolrang janapangaha. Unbaksana Backlog policy ko nipiltaianichi A∙chik manderangni man∙a nanggni aro re∙anggipa bilsi 50-na galchipgimin kamrangkoba nirokatna dakchakanggen ineba agandapanagaha.
Ia dabiani bidingo CM simsakbee kamrangko ka∙nagita ja∙ku de∙na nanga aro Tura ko Winter Capital songna name nipiltaianiko dakanichisa a∙dokko mikkangchi namroro silroroatna amgen ine bon∙kame Laben Marak aganangaha.
