Re∙baenggipa August jani 3 oni 9 tarikona Basketball Federation of India (BFI) ni Puducherry Rajiv Gandhi Stadium-o ong∙atnasienggipa chang 48 gipa Sub-Junior National Basketball Championship-o, Meghalaya Basketball Association (MBA) bilsi 14 ni ning∙o kal∙nagipa dolko seokangaha. Ia susaanio MBA dolo South Garo Hills, Baghmara-oni me∙chik chadambe sakgni, chong∙motan Tra. Deimi Dorimit Alaska R Marak aro Tra. Mechira N Sangma ba seokako man∙angaha ine kobor ra∙timgiparangna parakataha.
Ia kal∙susaanio MBA bilsi 14 ni dolrang a∙dok gimikni palo bakko ra∙e susaanganiko dakanggen. Uamangni namgipa dakmesokanina aro chubatgipa gadangrangona sokange chegipa ong∙aniko nike July jani 22 tariko a∙dokna kal∙na seokako man∙aha. Uamangko seokanio skigipa Larihun Warjri ni jakchi seokangaha aro Chairman Selection Committee ni ra∙chakani ja∙mano bimingrangko parakatskaaha.
