East Garo Hills a∙jao Samanda Block-ni ning∙o donggipa song Dolwarigre-ni manderang mikka jimbee waanichi aro Simsang chibimako kabatgipa dolongko man∙pakanganichi re∙ruraanio bang∙a neng∙nikaniko man∙enga. Neng∙nikanirangko man∙genchimoba ua jolni manderang Basin Development Authority ni dakchakaniko man∙e chonbegipa bolni ringo boldambe chararangko Simsangko batsote ra∙angniko nikna man∙angaha.
Ia kamko Village Project Implementation Committee (VPIC) dolrangni dakchakanichi, MegLife-o kam ka∙giparang aro songni manderangni jinma bakrimanichi pang 19,485 bol chararangko ringo gatange ra∙rurana man∙aha. Ia kamrangko chu∙sokatna man∙aniara Dolwarigre songna mangmangsan ong∙aijaha, Rongara Block-oba pang hajal 23,076 chararangko ringo ra∙rurae Rongara Block-oni 20 Km mang chel∙ao donggipa Taidang songona sokataha ine Dolwarigre songni manderang aganangaha.
