North-East a∙dokrango bija jilaniko namdapatna ba tang∙doatna dingtang dingtang dolni dilgiparang baksa salgnina tom∙e chanchirimanio Meghalaya Farmers’ Empowerment Commission (MFEC) aro North East Centre for Technology Application and Reach (NECTAR) nangrime MoU ko soi ka∙angaha. Salgnina ong∙atgipa tom∙bimonganio Chief Minister Conrad Sangma unbaksa gipin dal∙dalgipa dilgiparang, ge∙a game cha∙giparang aro bija jilanio changgipa sapgipa manderang bakko ra∙angaha.
Ia MoU ko soi ka∙anichi a∙doko bija jile cha∙enggiparangna dingtanggipa aro gitalgipa budirangko skie on∙angan baksa uamangni changa sapaniko aro u∙ianiko bariatna dakchake on∙anggen ine kobor ra∙timgiparangna parakataha. Iako bija jile bading chiwale cha∙aniko tang∙doatna dakchaknagita miksonge ong∙atangaha.
A∙dok sorkari bija jilgiparangko dakchakna tangka gong 50 crore ko chamataha. Ia chamgimin tangkarangko dam 48 bija jilenggipa biaprangona sualatgen. Chamgimin tangkarangko sak 5000 bija jilenggiparangna on∙anggen jeon sakprako gong 70,000 ka∙e tikanggen. Unbaksana Integrated Bee Development Centre Sambrak, North Garo Hills-o a∙bachengatanichi a∙doko bija jile cha∙enggiparangna bading chiwale cha∙na tang∙doatna dakchakani ong∙gen ine parakangaha.
