A∙doko jawilwat tarianio niksenggipa Dominic Sangma ni gitalgipa jawilwat ‘Rapture’ ni noksako Chief Minister Conrad K Sangma da∙al salni bako oprake on∙angaha. Rapture ba ‘Rimdogittanga’ jawilwatni chu∙gimik bakroa konta gni minit sni mang ong∙a. Ia jawilwatko India, China, Switzerland aro Qatar baksa bakrime tariaha jeon a∙gimikni jawilwat a∙damrangona jekai Film Bazaar, Tokyo Talents (producer), BoostNL 2019, Berlinale Talents (director) aro La Fabrique du Cinema 2020 rangona sokangaha.
Ru∙utgija somoi mangmango, ia jawilwatko August jani 2 oni 12 tarikona mingsing minggamgipa Locarno Film Festival Switzerland o gipin a∙songrang baksa Concorso Cineaste del Presente section o susana gita seokako man∙aha. Ia jawilwatko tarianio Sangma, superstitious ba an∙tangni ong∙gija chanchipe bebe ra∙ani kri, jumang aro a∙gitalni brinanina kenaniko mesoka jeon jingjingbeng jo∙ong bilsi bri prako a∙aoni nadoaniko mesokangaha.
