ACHIK dolrangni Tura-o Winter Capital ko on∙china dabianio okgimu chake bakko ra∙giparang salantio batroroenga. A∙chik Youth Movement for Betterment Society (AYMBS) dolrangba Tura-o Winter Capital-ko donna nanga ine bil jakko on∙e chakpaaniko on∙angaha.
Tura-ko Winter Capital songna 1972 bilsion an∙chingni pagitchamrang Meghalaya a∙dokko man∙chengdilgiparang mangsonge donangmanaha. Chinga Khasi-Jaintia jat oniko mamingkoba ra∙sekdraenga ong∙ja, indiba A∙chik jatna ku∙mikchetmangimin kosa sorkariko gisik ra∙atpilenga ine AYMBS President Peterjob A. Sangma aganangaha.
MDA sorkarini ku∙wattimgipa Ampareen Lyngdoh-ni Winter Capital-na okgimu chake dabiani bidingo agangimin kattarangara partyni gita aganahama ma sorkari nigita ma Chief Minister Conrad Sangma aganchina ge∙etahama ine uamangni jajaaniko talate on∙china AYMBS dolrang janapanagaha.
