Tura-ni Social Activist, Cherian Momin, Tura-ko winter capital songchina aro backlog ba ru∙utbea bilsirangna man∙a nanggni kamrangko on∙china dabianiko tarake niatpachina Chief Minister Conrad Sangma aro a∙dokni Governor-na chittiko sedoataha. Momin, reservation policy-ni bidingo A∙chikrangni bilsi sotbongaoni da∙ona kingking galchanganiko man∙anina jatni neng∙nikaniko niatpachinaba mol∙molangaha. Ia apsan chittikon ua a∙dokni bang∙a A∙chik Minister-rangnaba on∙angna tik ka∙aha.
MDA sorkarini A∙chik jatni kosako sinjetanina aro dabianirangko nikchanganina Momin uni kusi ong∙gijaniko parakangaha. Indake nikchange dal∙e ra∙gijaniara A∙chik jatna namen ka∙a be∙ani ong∙a aro iako taraken niatchongmotna nanga ine Momin aganangaha.
ACHIK dolni ong∙atenggipa okgimu chake dabianio bakko ra∙enggiparangoni saa ding∙aniko manenggipa GSMC ni Co-Chairman Balkarin Ch. Marak-na namgipa sanna bannaniko on∙a sorkari gisiko nangjaha. Ian Khasi jatrang ong∙skaode sorkari uko dingtang nirokaniko on∙genchim ine Momin matnanga gnang aganangaha. Ia kamrangchi jatsa jatgipin baksa ma∙ekataniko ra∙bana ama aro ian a∙songni dongimin niamko pe∙aniba ong∙a ine ua agandapangaha.
Garo jatrangni Tura ko winter capital aro backlog rangko on∙pilchina dabianiko sorkari taraken niatchongmotna nanga ine Momin diadiangaha. GSMC ni Co-Chairman aro gitcham MCS, ACHIK ni Council of Elders Laben Ch. Marak ni be∙en bimangni bilgrianiko nina sorkari sanna bannaniko on∙anio dakchakna nanga ine ua parakangaha. Uamangni jatna on∙kanganiko sorkari nikgijadake dongna nangja aro taraken nama bewalo aganchakaniko on∙ate uamang baksa golpogrikna nanga ine Momin aganangaha.
