Umiam-o chu∙ongagita chirang ditdoahani gimin Shillong, Tura aro Jowai o konta gni na bijoli den∙aniko komiataniko dakanggen aro apsan daken a∙dokni gipin biaprango konta 5 na bijoli den∙aniko July 18 tarikoni dakangskana MeECL tik ka∙angaha.
MeECL ni aganani gitade re∙anggipa July 12 oni bijoli de∙naniko konta 5 ona komiatangaha aro July 15 tarikoni jilla rango konta 4 ona komiatangskaaha. Umiam-o chi tang∙doaniko nike ia kamrangko ka∙enga ineba parakataha.
Unbaksana re∙anggipa sal somoi rango a∙dokni ra∙chakgimin bijolirangko jean 450 Million Unit (MU) koba dingtang dingtang bijoli sualgipa company rangna chotpilskaaniko dakenga ine MeECL ni Chairman aro Managing Director Sanjay Goyal parakataha.
