A∙doko chu∙ongagita mikka waanichi chiring chibiksikrang kraagita tangpilahaoba, bijoli wata namdapkujaengani gimin bang∙a manderang iani bidingo jajaanirangko man∙e sing∙doaniko nikna man∙enga. A∙doko bijoli den∙ani da∙onaba komikujaenganina MePDCL-rang maiba parakna amgijagipako donnuna jotton ka∙enga ine TMC dilgipa Dr. Mukul Sangma matnanga gnang aganangaha. Chu∙ongagita mikka bitchirangko man∙genchimoba a∙doko bijoli watani bidingo uamang pasikanirangko on∙kuenga. Ian manderangni neng∙nikaniko nichange kam ka∙ani ong∙a aro uamangni gisepo mikbokrake an∙tangtangna man∙gnina rikaniko mesoka ine Sangma parakangaha.
Unbaksana Sangma, Justice Retd. RM Mishra-ni re∙dilenggipa Committee, MePDCL ni kamrangni bidingo am∙sandie man∙gipako a∙dok sorkarini jinmana parakatkujaengani gimin TMC-ni dilgipa aganangaha. Ia report-ko sorkari nipilna jechakengama ineba Sangma sing∙doaniko dakangaha. Baditana sorkari manderangni neng∙nikaniko ja∙ku de∙gija nikchange donggen ine Sangma uni jajaaniko parakatchina sorkariko matnanga gnang aganangaha. Mukul ia kattarangko adita salrangna skang Umiam dam o chirang gapsuakani a∙selo, damni ka∙mao songdongenggipa manderangko Ri-Bhoi a∙jani Deputy Commissioner simsake dongchina ge∙etani ja∙mano uni chanchianiko parakatskaaha.
