National Common Entrance Test (NCET) Teachers Education Programme porikkarangko namnikatang ku∙sikko basee sena man∙a gita dingtang dingtang ku∙sikrangko National Test Agency (NTA) riting dake segate on∙angaha. Meghalaya a∙dokni manderangna jekai Khasi, Garo aro Alternative English ku∙sikrang dongjani gimin chatro chatrirang, ma∙aparang aro skia-poraianiko on∙enggiparang kusi ong∙gijani ba namnikgijaniko mesokangaha. Meghalaya a∙dokni manderangni nangnikgipa ku∙sikrang dongjani gimin Khasi, Garo aro Alternative English ku∙sikko Language 2 Section I (33) o man∙chapate ra∙gate on∙china gita Social Activist Cherian Momin, Education Union Minister Dharmendra Pradhan-na chitti see mol∙molataha.
Meghalaya a∙dokni manderangna ku∙sikko basee porikkako sena man∙a gita NTA-ni ra∙gate on∙aniko namen nangchongmotenga maina a∙doko dingtanggipa dakbewal rikbewal, ku∙sik aro poraia skiani bidingo tang∙doatnagita nangenga. Ia neng∙nikanirangko ia somoio National Council for Teacher Education (NCTE) ko nirokatpachina aro didiatchina Momin mol∙molangaha. Iako ra∙gate on∙anichi Meghalaya a∙dokni chatro chatrirang jakkaltonikbatgipa ku∙sikko basee sena gita cholko man∙a ka∙dongsoenga.
Una agreba Meghalaya a∙dokni ku∙sikrangko basee sena cholko on∙engon, sing∙anirangkoba Section I language-o on∙dapchinaba aganaha, jedakode da∙o ong∙enggipa obostarangko olgrokatna gita dakchakgen. Ia kamrangko ka∙e on∙anichi chatro chatrirang, ma∙aparang aro skia poraianiko on∙enggiparangni nangnikanikoba mikkangchi chu∙sokatna gita man∙gen ine Momin aganangaha.
Ia obostani bidingo a∙dokni Education Department 30/06/2023 aro 10/07/2023 tarikrango chittiko sedoataha unbaksana name niroke kamko ka∙china NCTE-naba watataha aro iani bidingo somoigita ta∙rake nirokatna nanga ineba Momin u∙iataha.
Meghalaya a∙dokni ku∙sikrangko Language 2 Section I-o ra∙gate on∙anichi chatro chatrirangna namgnisan ong∙aigija a∙dokni dakbewal rikbewal aro ku∙sikrangko ripingna aro niksengatnagitaba dakchakani ong∙anggen. Darangkoba mikkang nitegija kakketo kam ka∙e on∙anichi aro jakkandilanichi ia neng∙nikanirangko naljokatna ka∙dongsoenga ine Momin aganangaha.
