Resubelpara District Basketball Association (DBA)-ni North Garo Hills District Administration baksa nangrime ong∙atanggipa 2023 Inter-School Basketball Tournament ko mijal salni bako bon∙kamgipa kal∙aniko ong∙ate matchotatangaha.
Ia kal∙susaanio adita school rangni bak ra∙aniko niknagita man∙angaha. Me∙asa dolni kal∙susaanio Paschal Secondary School chegipa ong∙aha aro St. Thomas Secondary School gnigipa biapko man∙skaaha.
Apsan dake me∙chik dolrangni kal∙susaanio Resubelpara Govt. Higher Secondary School chegipa ong∙aha aro Dilma A∙pal Higher Secondary School gnigipa biapko man∙angskaaha.
Mea∙sa dolni kal∙susaanio nambate kal∙gipani biapko Paschal Secondary School-ni Torean K. Marak aro me∙chik dolni gita Resubelpara Govt. Higher Secondary School-ni Lema K. Marak Most Valuable Player (MVP) ko man∙angaha.
Bon∙kamgipa salo North Garo Hills a∙jani ADC T R. Marak aro Meghalaya Basketball Association (Garo Hills Incharge) ni Vice-President T N. Marak ba dongpae chadamberangna mikkangchi ka∙dongani aro didiani kattarangko aganangaha.
