Mijal salni bako ritchani ritcha Chin, Kuki, Mizo aro Zomi jatrangni bang∙a me·a aro me·chikrang Mizoram-ni skotong songjinmao Manipur-ni Chief Minister N. Biren Singh aro Prime Minister, Narendra Modi-ni noksarangko so·e galangaha. Uamangni ia ja∙ku de∙aniara Manipur a·doko dongtonggija so∙sojengjeng ong·aniko jegalani chin ko mesokani ong∙a ine parakataha.
Ia jegalaniko ZO Reunification Organisation (ZORO) dolrang Manipur a∙doko jatgnini gisepo dakgrikanirang, kajia golmal ong∙anirangko ta∙rake tom∙tomatchina aro tribal jatrangna dingtang a·dokko on·china dabianiko dakangaha. Jatgnini gisepo golmal ong∙anirang jagittam mangna batpilahaoba, a∙songni Prime Minister Narendra Modi tom∙tomatani kamrangko ka∙gija mamingkoba agangija jripjrip dongani gimin ZORO-ni President, R. Sangkawia namnikgijaniko parake matnange aganataha.
Ia re∙jomanio Manipur-o jemangan an∙tangtangni gamjinko, nokjamko aro janggirangko gima∙atahachim uamangna, Mizoram-ni manderangba kalimpaaniko on∙paa ineba aganangaha. Manipur-o kajia golmal ong·a a∙bachengaoni bang∙a Kuki-Zo-Zomi jatrang ka∙sin ka∙sin Mizoram a·dokona katnapbaaha aro a∙doko sak 12,000 mangni gita manderangna dongchakanikoba on∙angaha.
Mizoram a·dokni Skotong Minister, Zoramthanga Manipur-oni katnapbae songdongenggipa manderangna dongchakram aro cha∙ani ringanirangko on∙anio dakchakaniko on∙a Prime Minister Narendra Modi na tangka gong 10 crore-ko chamatchina gita May-ni 16 aro 23 tariko changgni chittiko see u∙iataha. Uamangko Mizoram-ni dam 11 a·jarango relief camp, nokpara ba maharirangni noko, gilja nok, songni melaram nok aro gipin biaprango nokchakaniko dakangenga ine ZORO-ni Vice-President, F. Ngurbiakvela aro General Secretary, L. Ramdinliana Renthlei parakangaha.
