Sabisirangoni naljoknagita biji su∙e on∙miting somoio, su∙manrikpagijagipa bi∙sarangni nokona re∙ange biji su∙e on∙aniko dakangaha. Ia matchotkugijagipa kamko ka∙e on∙a aro bi∙sarangni an∙seng baljokanina East Garo Hills a∙jani Bolkinggre Sub Centre-o sanna bannaniko dakgiparang nokantichi nape uamangni kamko chu∙sokataha.
Dingtang dingtang neng∙nikanirangko man∙e bang∙a songni manderang sepangbatgipa PHC ba Sub-Centre rangona re∙ange sabisioni naljokna dakchakaniko somoi gita man∙jaenga. Sanne banne on∙giparangni ia namgipa ja∙kuko de∙anichi bang∙a bi∙sarang uamangni noktangon donge maming neng∙nika gri biji su∙nagita man∙enga.
