Ma∙mong sorkari Finance Ministry ni dam 22 a∙dokrangna Sate Disaster Response Fund (SDRF) na chamgimin chu∙gimik tangka gong 7,532 crore oniko gong 27.20 crore ko Meghalaya a∙doknaba chamataha.
India a∙songni bang∙a biaprangon mikka jimbee waanirangko nike a∙sel ong∙anirango dakchakaniko on∙na gita sorkari ja∙ku de∙angaha. Rang∙gitik a∙sel ong∙anirango ta∙rake kam nanggipa ong∙ani gimin niamrangko olgrokate battanggimin bilsio jakkalgimin tangka paisani reportrangko nichengna senggija Ministry of Home Affairs a∙dokrangona tangka rangko watataha.
A∙dokrango a∙sel ong∙anirangna ta∙rake dakchakaniko sokatna gita Disaster Management Act-o pangchake State Disaster Response Fund (SDRF) ko ma∙mong sorkari a∙bachengataha. Finance Commission-ni niamo pangchake ma∙mong sorkari bak gni dake tangkarangko watna tik ka∙gimin donga. SDRF na bak dake tangka chamaniko dakanio Northeast aro Himalaya jolni a∙dokrangna bang∙bata bakrangko done tangkarangko chamataha.
SDRF na tangka chamaniko15th Finance Commission ni niamo pangchake ma∙mong sorkari chamataha. Ma∙mong sorkarini da∙alona chamgimin tangka gong 42,366 crore ong∙aha aro ia chamgimin tangkarangoniko a∙dokrangona mitamko watna gita man∙aha. Ong∙telaigipa obostarangchi rang∙gitik a∙sel ong∙anio ga∙akgipa nokdangrangna ta∙rake dakchakaniko sokatanian SDRF ni mangsongani ong∙a.
