Garo Hills Catholic Union (GHCU)-ni dilgiparang re∙anggipa July 8 tariko, Executive Committee tom∙bimonganiko, SGH a∙jani Dumnikura Parish-o dakangaha. Ia tom∙anio bakko ra∙giparang pilak ong∙enggipa obosta aro a∙selrangni bidingo jinma golporime chanchiangaha. Uamangni nangchongmote chanchirimanggipa katta bichongara Manipur a∙doko so∙sojengjeng ong∙enggipani bidingo ong∙a.
GHCU dolrang, Manipur a∙doko bang∙a manderangni nokgri jamgri ong∙e kate chakani, so∙otani, sorkarini dingtanggipa bilko jakkalani aro gilja nokrangko nosto ka∙ani bidingo uamangni chanchirimanio janapangaha. Manipur a∙doko ong∙enga obostarangni bidingo golporimengon uamang an∙tangtangni duk ong∙aniko parakangaha. Unbaksana ma∙mong sorkarini ia so∙sojengjeng ong∙enganiko tom∙tomatna maming ja∙kuko de∙na skani donggijaniko nike uamangni duk mikchi ong∙anikoba janapangaha.
GHCU dolrangni tom∙bimonganio Manipur a∙doko tom∙tomaniko ra∙bapilna Memorandum ba nangnikaniko a∙songni Prime Minister Narendra Modi na on∙angna jinma kusi ong∙e ra∙chakangaha. Ia memorandum ko ma∙mong sorkarini Home Minister aro Meghalaya a∙dokni Chief Minister naba on∙anggen ine GHCU parakangaha. Uamangni on∙angna tik ka∙gimin memorandum o Manipur a∙doko tom∙tomaniko ra∙bapilna aro jatsani gisepo dakgrik dinggrikaniko dontongatchina ja∙kurangko de∙na mol∙molaniko dakangaha.
