July 11 tarik, Mongolbar attamo Meghalaya a∙dokni Health Minister Ampareen Lyngdoh ko Shillong Kharmalki jolni bilsi 46 ong∙gipa Teibor Lyting, uni dongchakenggipa nok mikkang Laitumkhrah-o matsramgipa bostu chi chadrapaha.
Online chanchirimanio bak ra∙miting somoio kelkini sisarang gam∙ani gimin Lyngdoh ong∙katbae nion ma∙sina man∙gijagipa mande matsramgipa bostuchi chadrapaha. CCTV camera-o nie uni segipa aro MDC Fantin Lakadong bakan rong∙te gogipa mandeko rim∙na ong∙katbaaha. Dosi dakgipa mande pekgipa bostuko jakkale a∙sel ong∙aha, ua gisikni gita bilgrigipa mande ong∙ama ong∙ja uarangko name sandianirangko dakanggen ine pulis aganangaha.
Matsramgipa bostuko jako ra∙bitako nike anga namen chrikbeaha aro angni segipa aro degipa bakan re∙bae dosi dakgipako rim∙ena gita man∙aha. A∙sel ong∙a bakan SP ko okamataha aro uamang biapona sokbae sing∙sandianirangkoba dakengaha ine Ampareen u∙iataha.
