A∙dok sorkari aro National Thermal Power Corporation Limited (NTPC), Memorandum of Understanding (MoU) ko a∙doko bijoli wataniko namdapatna soi ka∙e songgigrikaniko dakangaha. Chief Minister Conrad Sangma aro Power Minister AT Mondal, NTPC ni Chairman & Managing Director, Gurdeep Singh aro MeECL ni CMD Sanjay Goyal, New Delhi-o ia soi ka∙grikanio bak ra∙angaha. Iachi sorkari, Project Management Services (PMS) ni a∙doko bijoliko sualenggipa Meghalaya DISCOM, Pump Storage Power Plants (PSPs) ko ra∙bana, Floating Solar project ba saloniko bijoli bikotani bidingrango kam ka∙na dakangaha.
NTPC-ni u∙igipa ma∙sigiparangko rimbae a∙doko bijoli on∙aniko nirokna MeECL na nambata daitoko suale on∙anian mingsa nambegipa ja∙ku de∙ani ong∙a. Iachi MeECL an∙tango donggipa bijoli bikotaniko nambata cholrangchi jakkalan baksa a∙gilsako bon∙changgijagipa green energy jekai sal aro balwaoniko jakkaltaitaina man∙gipa bijolirangko bikotna MoU-o chanchiangaha. Unbaksa jakkalkujagipa chonchongipa hydro project rangni gimin u∙ina kam ka∙na miksongangaha.
PSP rangko songani cholrangchi bijoli bikotgipa biaprango jakkalgimin chirangko salope dam ba chiko chimongchakramona watatpile jakkaltaitaina man∙a gita chanchianggen. Umiam aro dingtang chi gnanggipa biaprango floating solar power unit ko a∙bachengna cholrangko sandianggen aro bijoli bikotanio a∙doko maming nosto ka∙a gri green energy ba rongtalgipa bijoliko bikote jakkalnagita man∙angskagen. A∙doktangon bijoliko chu∙ongagita bikotna man∙a chanchie re∙mikkanganian ia MoU ko soi ka∙grikani miksongani ong∙a ine parakangaha.
