Adita salrangna skang Meghalaya Upper Primary School Teacher Association (MUPSTA) dolrang dam 844 adhoc skulrangko deficit system-ona ra∙dona sorkario dabianiko dakangahachim. Iani bidingo a∙dokni Education Minister Rakkam A. Sangma, uamangni dabianiko chu∙sokatna sorkarini bilni a∙palo ong∙a ine aganchakangaha.
Sangmani parakani gitade Upper primary san ong∙aigija Lower primary, Secondary aro SSA skigiparangba uamangni kamko regular ong∙atna dabianirangko dakenga. Iani bidingo sorkari kam ka∙na da∙o bil am∙sokujaenga ine ua aganangskaaha. Sorkari mikkangchi ia dabianirangko niatna nambata cholrangko sandie raken kam ka∙angna miksonganiko Sangma u∙iataha. Skigiparangni neng∙nikanirangko tangka paisa-rangnigita olgrokataniara namen dal∙bea ineba ua agandapangaha. Sorkarini ia ja∙kurangko de∙anichi namgipa biterangko man∙a amgen ine Sangma ka∙donganikoba parakangaha.
