Sonibar attamchibara, dingtang dingtang manderangni bimingo cha∙ue kuligipa ATM card rangchi tangka okna am∙aniko manderangni u∙iatanichi Phulbari Pulisrang Turaoniko rim∙aha ine Superintendent of Police, Vivekanand Singh Rathore u∙iataha.
Pulisrangni u∙iatani gitade ua mandeko Lotiful Islam jean South Salmaraoni ong∙a ine u∙ina man∙aha. Ua mandeoni ko ge 44 HDFC Bankni ATM card aro kuligimin enveloperang, ge∙prak IPPB aro SBI cardrang baksa passbook rangko man∙aha. Unbaksana uoniko ge∙gni mobile phone, scooty bolsa (AS-18H-7723) aro tangka gong 10,290 koba man∙aha ine u∙iataha.
Dosi dakgipako sing∙sandiani ja∙mano, uko Tumni Post Office, South Salmara Assamni Assistant Branch Post Master kamko ka∙enggipa Baro Ravatary, South Salmaraoni Ashraful Islam sa ia niam gri dakgipa kamrangko ka∙china ge∙etaha ine u∙ina man∙skaaha.
Pulisrangni chanchipe aganani gitade, Islam, manderangni ATM card ni envelope rangko uamangna u∙iatgija sruksruk kulie ATM pin rangko jakkale tangkarangko okna am∙engachimkon ineba parakataha.
