West Khasi Hills a∙jani Langpih songni sima-ario mai obostarang ong∙enga uko niroknagita Regional Committee dolrang Mongolbar salo Nongstoin DC office-ni Trysem Hall-o agan-golpoanirangko dakangaha.
Ia committee-ni tom∙bimonganio Cabinet Minister Paul Lyngdoh tom∙aniko dilangaha unbaksana Mawkyrwat-ni MLA Renikton Lyngdoh Tongkhar, Rambrai-Jyrngam-ni MLA R G. Momin, KHADC-ni Deputy CEM Pynshngainlang Syiem, MDC Bajop Pyngrope, KHADC-ni Legal Adviser Robertjune Kharjahrin, WKH-ni DC Garod L S N Dykes, WKH-ni SP Bikram D Sangma aro Langpih songni manderang aro nokmarang ia tom∙anio bakko ra∙angaha. Dam 41 songrangoni Khasi aro Garo-rang bakko ra∙e bang∙a chanchirimanirangko dakangaha ine kobor ra∙timgiparangna parakataha.
Regional Committee ni tom∙bimonge chanchianio dam 52 songrangoni dam 41 songrang Meghalaya-ni bako ong∙na nangnikaniko chittirangko on∙e janapangaha aro dam 9 songrang Assam-ni bako ong∙na nangnikaniko aganangskaaha. Re∙baenggipa salrango Langpih jolrangko nianirangkoba dakangan baksa tom∙anio chanchigiminrang baditana chu∙soka, uko nipilanikoba dakanggen ine Lyngdoh aganangaha.
Sima-ari jolo donggipa songrangni badia song badia a∙doko chape bak ong∙na sikaniko name ma∙sina gita man∙kujaenga maina da∙ona kingking Assam-ni aro Meghalaya a∙dokni committee rang bakrime nirokaniko dakujaenga. Unbaksana songko dilgiparang aro manderangni nangnikanirangko nigrike ja∙ku de∙anggen ine committee-ni gitcham Chairman Renikton Lyngdoh Tongkhar aganangaha.
