Chokpot Block-ni ning∙o donggipa Monrongsnagre LP skul aro Dagalgre LP skulrangko bilsi bonga mangna kulichipgija donengani gimin Silkigre Unit ni GSU dol, South Garo Hills a∙jani District School Education Officer (DSEO) na badi ka∙doangaha.
Silkigre GSU dolni u∙iatani gitade, iani bidingo Skulni Managing Committee (MC) baditaba changna District Elementary Education Officer (DEEO)-na badi ka∙doahachim. Ia badi ka∙anio DEEO maming ja∙ku de∙anirangko dakgija skulrangko galchipe dongenchim ong∙ode songo-noko poraienggipa bi∙sarangna namen gimaani ong∙gen ine uamang parakataha.
GSU iani bidingo skulo skigiparang aro Officer rangni kosako sing∙sandianiko aro kraa bichalrangko dakchina nanga ine mol∙molangaha. Uamangni dabianiko, a∙jani DSEO nirok sandie chu∙sokatanggen ine ka∙dongani kattarangko GSU ni President Johnpikilap R. Sangma aganangaha.
