Meghalaya sorkarini STAR programme ni ning∙o ‘Super Elite Programme’ ko Sports and Youth Affairs Department kal∙susagiparangna a∙bachengate on∙angaha. Ia programme-o nambatgipa sak 12 kal∙susagiparangko a∙songo aro gipingchi susaanio aro 2032 Olympic o bak ra∙na man∙agita miksonga gnange tarisamsona gipin a∙songoni changgipa sapgipa skigiparangchi skie on∙aniko dakanggen ine parakataha.
Sak 14,500 mangna bate a∙dok gimikoniko Edge10 technology-chi phase ge∙gniniko porikka ra∙aniko dakangaha. Phase 1 ni sak 4,500 kal∙susagiparangko Ian Campbell ni ong∙atenggipa Elite Pathway Programme na seokaha jean bilsi gimik app-ni gita aro jagittamprako training camp rangko ong∙ate skianirangko on∙skagen. Ia dol niko sak dok ko athletics-na, sakgniko weightlifting-na aro saksako karateka-na kal∙susagiparangko seokaha aro seokako man∙gijagiparang Elite Pathway Programme ni ning∙on susaaniko dakangkugen ine kobor ra∙timgiparangna parakataha.
Phase 2 ni gitchagipa sak 10,000 susagiparangkoba apsan daken seokaniko dakanggen. Super Elite Programme na sakgittam kal∙susagiparangko seokgen aro kal∙susagiparang chu∙gimik sak12 ong∙gen.
MSOA aro Sports Department Garo Hills aro Khasi Hills a∙ja ni kal∙susaanio bakko ra∙na seokako man∙giparangna poraiani, cha∙a ringani aro dongchakani biaprangkoba on∙anggen. Ia programme-ni ning∙o uamangni nama namgijaniko bilsi gittamna batpile nianggen aro dingtang dingtang kal∙susaanio changgipa sapgipa skigiparang nirokanikoba dakanggen. Kal∙susagiparang Shillong o skie ranta ka∙e kal∙susaanirango bak ra∙e mikkangchi gipin a∙songrangoba kal∙susanagita cholko man∙anggen ine Sports and Youth Affairs Department aganangaha.
