A∙dok sorkarini batanggimin salrango CUET porikkani bidingo mangsonganirangko name talatjani a∙selo chatro chatri, ma∙apa aro manderangni gisepo jajaanirang ong∙katenga ine saksa social activist, Cherian Momin koborko on∙ataha. Sorkarini salsa batbat agananirango dingtanganichi chadamberangna jajrengani aro sinteaniko ra∙baenga ine ua Chief Minister aro Education Minister ni kosako matnange aganangaha. Momin, sorkariko CUET ni bidingo kakket aro bebe ong∙gipa koborkosa manderangna parakate on∙china mol∙molataha.
Sakanti chadambe chatro chatrirang aro ma∙aparang sorkarini rongtale agananiko nanga jeon uamang porikkani somoi, sal aro dakna nanggni kamrangko u∙ina bil amgiparang ong∙na man∙gen. Porikkani bidingo tale u∙igijaniara bi∙sarangna poraie tarisamsona neng∙nikaniko on∙a ine Momin parakangaha. Sorkari pilak chatro chatrirangni nanganirangko skanggipa done kamko ka∙na nanga aro CUET ni bidingo bi∙sarangna u∙iatna kobor ra∙timgiparango, official website rango parakatna nangchongmota ine Momin janapangaha. Manderangni ka∙donganiko man∙a, namgipa ja∙kurangko de∙e uamangna dakchakaniko ia somoio sorkari on∙a nanga ine ua aganadapangaha.
