William Nagar a∙jani, National People’s Party (NPP) District Committee, uamangni party office-o tom∙bimonganiko dake Uniform Civil Code (UCC) ko ra∙gatna miksongani gimin jegalaniko dakangaha. UCC ko ra∙gatanichi a∙dokni daka-rika bewalrangko gimaataniona ra∙bagen ine uamang bill-ko jegalangaha. Committee-ni tom∙bimonganio, Manipur a∙dokni dontonggija so∙sojengjeng ong∙enggipa obostani giminba tom∙tompilanina bi∙chakaniko dakangjolaha. Sakanti bakko ra∙gipa manderang Manipur a∙doko dakgrik dingrikanio janggiko gimaatgiparangna kalimpaanikoba dakangaha.
William Nagar Unit ni NPP District General Secretary, Dominic Sangma tom∙ani miksonganiko aro UCC-ko ra∙gatanichi mikkangchi chagrongna sigipa neng∙nikanirangni gimin talate on∙angaha. NPP dol manderangni daka rika bewalrangko naljoke rakkina pangnan kamko ka∙angkuaigen ine Sangma agandapangaha.
Batanggimin salo Chief Minister-ni UCC na jegalanio chakpaaniko on∙na Tura songjinmani NPP dolrang jinma tom∙bimonganiko dakenba chanchirimaniko dakangaha. Unbaksana Parliament-o ku∙rangko on∙pae namnikgijaniko aganpachina, MP Agatha K Sangma aro Vincent Pala naba didianiko dakangjolaha.
