Resubelpara Dekachango donggipa Smt. Lakme K Marak-ni chalaienggipa, M/s Lakme Handloom ko mijal salni bako Agatha Sangma re∙ange nienba, A∙chikrangni ganding chindingrangni gamchataniko ripingna nanga ine ua ku∙patiangaha. Ia handloom-ko 2020 bilsio tangka gong 2.5 lakh rangko loan ra∙e a∙bachengataha.
A∙chikrangni dakmanda aro gipin ganding chindingrangko, ong∙telaigipa sam-bolrang aro ma∙manti bolam biterangoniko bikotgipa rong rangchi dim∙gimin kildingrangko jakkale, ia loom-o ba∙rarangko dokna jakkalaniko dakenga. M/s Lakme Handloom-o gitchamgipa dakbewal ko ja∙rike aro ripinge rakkianian ia loom ko dingtangmancha gun gnangata ineba Sangma kusi ong∙e uamangko de∙mittele aganangaha.
M/s Lakme Handloomo, da∙alo changgipa sapgipa kam ka∙enggiparang sak chet mang donga aro uni man∙anirang bilsi gimiko tangka gong 6 lakh rangko man∙enga ine parakataha.
