July jani 3 tariko a∙dokni skotong dilgipa Conrad K Sangma, ma∙mong sorkarini Union Minister-rang baksa adita neng∙nikanirangni gimin aro Common University Entrance Test (CUET)-ni bidingo chanchirimaniko dakna skotong songjinma New Delhi-ona re∙angenga. Ia somoirangni bako Conrad Sangma, Union Education Minister, Dharmendra Pradhan-koba gronge CUET porikkana centre-ko a∙dokni dingtang dingtang biaprango songani bidingo janapaniko dakanggen.
A∙dokni Education Minister Rakkam Sangma skotong dilgipa baksa Delhi ona songreangpagen ine koborko man∙soaha. A∙dita salrangna skang a∙dokni chatro chatrirang CUET porikkako seani bidingo uamangni sechakram biaprang Ranchi aro Kolkata a∙dokni a∙palrango ga∙akani a∙selo re∙ange sena gita neng∙nikaniko man∙ahachim. Uamang da∙al salni bako a∙dokni pora-skiani bidingo adita neng∙nikanirangko Union Education Minister baksa golporimanggen.
