Tura-ni MDC aro BJP State Vice President Bernard N. Marak aro District-ni gipin BJP dilgiparang, Mother Teresa Charity Home, Leper Colony aro TB Hospital-o sae dongenggipa manderangko grongan baksa cha∙ani bosturangko Sonibar attamni bako suale on∙angaha.
Uni grongani somoio Leper Colony-o dongenggipa manderangni dingtang dingtang neng∙nikanirangkoba segate ra∙baaha. Ua biapo dongenggipa manderang sorkarioniko maming ration-rangko man∙jaengani gimin, Marak aro uni dol uamangna dakchakaniko on∙a gita mangsongangaha.
Unbaksana ua Tura TB hospital-o sanna-banna niko dakenggipa manderangkoba grongaha. Sannako man∙enggipa adita sak manderangko Nikshay Mitra-ni ning∙o napatna jotton ka∙gen ine ka∙dongatani kattarangko aganbaaha. Modi sorkari bilsi skuni gisepon a∙songni bang∙a manderangna kona noksik dingtangatanirangko ra∙baaha aro BJP dol darangkoba mikkang nitegija watchangani gri manderangna dakchakaniko on∙a ka∙dongsoenga ine Bernard N. Marak parakataha.
