Manipur a∙doko so∙sojengjeng ong∙ani uno songdongenggipa Meitei aro Kuki rangni gisepo dakgrik dingrikaniko da∙onaba nikna man∙kuenga. Uamangni jagni ong∙pile da∙ona dakgrikanio sak 120 manderangna batpile janggitangko gimaatna nangaha. Sak hajal 70 mang manderang nokgri jamgri ong∙e dongenga aro unoni sak 50,698 manderang naljoke donggipa a∙damrango chake dongtokenga. Mitam manderang Assam aro Meghalaya a∙dokonaba re∙bae dongtokenga ine Rights and Risks Analysis Group (RRAG) ni Director Suhas Chakma koboro u∙iataha.
Northeast a∙jani Itihas o ian skanggipa jatsani gisepo ramram manderangni dal∙begipa dakgrik dinggrikanio jaknanggipa ong∙a. Hajal 3 batpile manderang an∙tangtangna silchidarerangko jakbittoke a∙dokni biaprango jakgitele roaniko nikna man∙engaha. Article 355 ko 2023 bilsini May 6 tariko tom∙tomaniko ra∙bana ra∙gatgenchim ong∙oba ua chu∙sokgipa ong∙jaha. Uni chu∙sokgijani a∙selo Article 356 ko ra∙gatanio jatsani gisepo pil∙taie obosta namjabataniko nikna man∙angskaa. RRAG dolrang Manipur a∙doko tom∙tomaniko ra∙bapilna President ba padot ni niamo sason ka∙aniko ra∙gatchina didianganiko on∙angskaaha.
